أبكو معي

كتابات ساخرة
saleem10013 يناير 2018آخر تحديث : منذ سنتين
أبكو معي
رابط مختصر

صحى فهيم أفندي من نومه و لقى الحمار ميت ! .. أخذه عالدكتور البيطري حتى يعرف سبب الوفاة ، تفاجأ من قول الدكتور  انه الحمار مات بالجلطة ، لف فهيم أفندي وجهه للحمار ، و مسك رأسه ، و أخذ يكلمه بتعجب وحرقه واستغراب :  لك ليش حبيبي اجتك الجلطة.. ؟ قصرت وياك بالبرسيم ؟ انت خريج هندسة وشغلتك حمال ؟ لو خريج طبية وشغلتك سكيورتي ؟ خريج تجارة ،  ووكفتك بسوق الخضرة ؟

جاوبني حبيبي انت ، كنت خريج أداب و صرت تسوق تاكسي ؟ لو حتى التكسي ما طحت باليد وصرت تشتغل اوبر ؟ رد عليّ يا رفيق الدرب العويص .

أدري يا حماري يا عمري انت ، كنت خريج زراعة بالعراق  و أجاك تعيين تشتغل كاشير ؟ اخاف كنت مديون وما قدرت تسدد ديونك ؟ لو سحبو مواليدك ولازم تخدم احتياط بالجيش ؟

عاملتك أحسن معاملة ، ولليوم ما اعرف بيك من يا قومية ولا من يا طائفة ، أعرف بس انك من مكون الحمير ، طيب ليش تتركني لوحدي ؟ جاوبني ، رد عليّ

أكو حمار سرقك أو نصب عليك ؟ حاولت تسوي مشروع وحكموا المسؤولين إلا تنطيهم رشوة مو معقولة حتى يوافقولك عالمشروع ؟ طيب إنكليزيتك ضعيفة وما قدرت تشتغل بكندا ؟

أحد من أهلك مخطوف و مطلوب عليه فدية مبلغ كبير ؟ محتاج فلوس و وقصرت وياك؟ ردت تعادل شهادتك وما كدرت ؟ ردت اجازة سوق وفشلت بالإمتحان عشر مرات وأصابك اليأس ؟ إنطلبت للكردت وما قدرت تدفع الحد الادنى من مبلغ الدفع ؟ ما قادر تشتري ملابس حتى من الفاليو فلج ؟

حبيبي ليش أجتك الجلطة فهمني ؟ ما قادر تدفع الموركج ؟ الدنيا اسودت بوجهك من كثرة البلات اللي تجيك يومية بالبريد ؟ الأسعار اللي يومية ترتفع بحجة زيادة المنيمم ويج اللي عملها ترودو اخيراً ؟ تزوجت من وره ظهري وزوجتك ضربتك دبة ثاني يوم وقالتلك نمشي عالقانون الكندي ففتي ففتي وقاسمتك ما تملك ؟  متكئب لما تشوف اكو ناس يلعبون بالبيضة والحجر وانت مو قادر حتى تلعب بخص . . . نك ؟  وحدة حبيتها وعملتلك بلوك عالفيسبوك ؟ تمرضت واللي كنت تعتبرهم أصدقاء ما زاروك ولا حتى اتصلوا تلفون بيك ؟

هنا تمللمل حمار فهيم أفندي وأنتفض وقال : كل اللي ذكرته صار وياية وتريدني ما انجلط ، لك خليني أموت وارتاح شتريد منييييييي ،  روح الله يسامحك

إستفاق فهيم أفندي من حلمه لاعناً الشيطان على هذا الكابوس

اترك تعليق

لن يتم نشر عنوان بريدك الإلكتروني. الحقول الإلزامية مشار إليها بـ *


شروط التعليق :

عدم الإساءة للكاتب أو للأشخاص أو للمقدسات أو مهاجمة الأديان أو الذات الالهية. والابتعاد عن التحريض الطائفي والعنصري والشتائم.